Rusiya baş nazirinin müavini Aleksey Overçuk bəyan edib ki, Ermənistanın Avropa İttifaqına (Aİ) üzv olmaq istəyi yaranarsa, İrəvanın Aİ ilə Avrasiya İqtisadi İttifaqı (Aİİ) arasında seçim etməsi qaçılmaz olacaq.

Onun sözlərinə görə, Ermənistanın Aİ-yə qoşulması ilə bağlı danışıqlar, əgər belə bir imkan yaransa, uzun illər çəkəcək.

“Aydındır ki, əgər Ermənistan nə vaxtsa Avropa İttifaqına qoşulmaq istəsə, bu gün hələ belə rəsmi proses yoxdur. İstək haqqında qanun var, amma bundan artıq heç nə yoxdur. Əgər nə vaxtsa bu cür danışıqlar rəsmi şəkildə başlasa, onlar çox uzun illər davam edəcək”, – deyə o, jurnalistlərə bildirib.

Overçuk qeyd edib ki, Avropa İttifaqı artıq 1990–2000-ci illərdəki kimi deyil və “bir vaxtlar inkişaf edən, üzv ölkələrə genişlənmə və tərəqqi imkanı verən bir birlik kimi qəbul olunurdusa, indi bu təsəvvür dəyişib”.

“Ona görə də Avropa İttifaqının dinamikasına baxmaq lazımdır – o, nəyə çevrilir? Bu gün Avropa Komissiyasından, Brüsseldən gələn bəyanatlara diqqət yetirmək vacibdir. Çünki Avropa İttifaqı iqtisadi birlikdən hərbi-siyasi ittifaqa çevrilir. Bunu da nəzərə almaq lazımdır”, – deyə o vurğulayıb.

“Avropa İttifaqının mahiyyəti gözlərimizin önündə dəyişir. Ermənistan xalqı özünə bu sualı verməlidir: Rusiya Federasiyasına qarşı bu qədər aqressiv mövqe tutan hərbi-siyasi birliyə qoşulmağa hazırdırlarmı?” – deyə Overçuk əlavə edib.

Sonda o bildirib ki, Ermənistanın hansı inteqrasiya birliyini seçməsi barədə qərar yalnız onun xalqına məxsusdur.

Dünya KİV